VII

MES FRUSTRATIONS - VII
Le silence est un crime
Annou revòlte
Fè mesaj la sikile

Anpil fwa mwen mande pou n revòlte kont vòlè, kadejakè, magouyè, kidnapè san manman yon fason pou n rive viv tankou moun, gen moun ki kraponnen paske yo panse yo ka mouri...
M ta renmen nou eksplike m kisa n ap defann nan lavi sa a ki fè nou pè goumen pou yon lavi miyò a.
Nou ta renmen toujou gade tifi 12 an k ap kouche pou yon plat manje?
Nou ta renmen toujou gen plis pase 30 an pou n sou kont paran nou?
Nou ta renmen toujou paka manje malgre nou fè plis pase 20 an lekòl ?
Nou ta renmen toujou ap dòmi devan kabann moun malgre nou fin granmoun ?
Nou ta renmen toujou wè prezidan, minis, palmantè, boujwa ap kontinye pase malere nan betiz?
Nou ta renmen toujou aprann yo kidnape epi touye pitit malere parèy nou?
Nou ta renmen toujou paka viv jan nou dwe viv?
Nou ta renmen pou pastè, pè kontinye fè nou reziye n ak move lavi pandan y ap ranmase richès ?
Nou ta renmen toujou pou kouche ak yon moun pou nou jwenn travay ?
Nou ta renmen toujou kontinye mete wòch bouyi sou dife pou fè pitit nou kwè n ap prepare manje pou li?
Nou ta renmen toujou gen yon peyi kote otorite yo pa menm ka etenn yon dife ?
Nou ta renmen toujou gen yon peyi kote otorite yo pa menm ka retire fatra nan lari a?
Nou ta renmen toujou gen yon peyi kote otorite yo kontinye ap pase nou nan betiz nan di y ap fè pwojè pou nou?

Anvan 1804 nou te kwè nan LIBÈTE OUBYEN LANMÒ, plis pase 200 an apre nou pito reziye nou nan PITO NOU LÈD NOU LA.

Ebyen si w vle viv tankou moun, nou dwe revòlte kont tout dirijan mètdam, kont tout vòlè k ap pale tankou moun serye, nou dwe ranvèse yo ak mwayen nou genyen, nou dwe leve kanpe pou n fè yo konnen nou la...

Sinon nou fèk kare viv pi mal pase chen lakay yo!!!

*Ourdy Dessources in Journal d'un révolté