Ki moun ou idantifye ki ka fè kèt la pi byen pou ou lè yo kidnape w?
Ou swete mouri bò lakay yon otorite tankou mèt Dorval, oubyen disparèt tankou Legagneur, oubyen sou yon pil fatra tankou Evelyne, oubyen ankò anndan yon fakilte tankou Grégory, oubyen nan machin ou tankou Rospide Pétion, oubyen pou pozisyon politik ou tankou Gana, nan men yon paran w oubyen lakay ou tankou anpil lòt?
Ki kalte gwoup kidnapè w ta swete pran w?
Ki medya w ta swete ki pou fè plis buzz ak kadav ou? Medya sosyal yo? Medya tradisyonèl yo?
Kijan w swete yo enprime foto w mete nan afich?
Ki rezo ou ta renmen ki gen plis views nan afiche kadav ou : YouTube ? Instagram? Facebook ? Twitter?
Nan lis moun ki mouri y ap afiche yo ki plas ou ta renmen ye ladann?
Lè yo fin mande 100 mil dola ameriken ak konbyen w ta renmen yo desann li?
Ou swete yo mete avi rechèch dèyè youn nan kidnapè w yo, si se pa gang nou konnen yo ki konn pale ak otorite yo?
Ki medya ak jounalis ou ta renmen ki jwenn lajan nan men pouvwa pou fè divèsyon sou kadav ou?
Kiyès nan opozisyon an ou ta swete ki itilze kidnapping ou an oubyen kadav pou montre peyi a ap mal mache?
Ki antite dwa moun ou ta renmen mete non w nan rapò yo?
Ki moun nan pouvwa a ki gen responsabilite pou mete sekirite nan peyi ou ta renmen kap fè toune nan laprès pou pote senpati bay fanmi w epi deresponsabilize pouvwa sou baz ensekirite a te la depi anvan Jovenel te prezidan?
Kiyès nan fanmi w oubyen zanmi w ou ta renmen yo filme pandan l ap kriye sou kadav ou?
Nan ka kidnapping pa w la, ou ta renmen moun bò lakay ou manifeste pou ou tankou jan sa te fèt nan Fontamara, Matisan?
Nan lis ki tit moun ou ta swete ye : etidyan, pwofesyonèl, pastè, avoka, monpè, antreprenè, chofè, travayè, chomè, jounalis, elèv lekòl?
Pami moun ki tonbe deja yo kiyès ou ta renmen nan menm lis ak li : Rospide, Saieh, Legagneur, mèt Dorval, Ti Badjo, Grégory, Evelyne?
Si nou pa kanpe pou chanje sa nou tout ap tonbe san sa pa chanje.
Dimitry Mike Colson Jean
Nap kenbe Toutan
(+509) 4853 7522
