Sa ki bay yon mwayèn 16 moun ki enfekte pa jou. Yon pousantaj ki parèt fèb si n ap konpare evolisyon maladi a ak lòt peyi ki genyen l yo.
Malgre dirijan yo toujou pale de transparans yo di yo aplike pou kominike ak popilasyon an nan sa ki gen pou wè ak pandemi Kowonaviris la, yon bon pati nan popilasyon an pa montre yo konprann pawòl zotobre nan Leta yo oubyen pa bay pawòl sa yo twòp enpòtans. Sitiyasyon sa a rive akoz pakèt manti yo abitye pran nan men dirijan sa yo, yo panse se "lajan ki kontinye ap gagote" nan fason Leta ap jere maladi sa a, men tou nan fason anpil ayisyen diskrimine moun ki gen maladi a.
Menm sila yo ki prezante kèk siy ak sentom maladi a pa vle aksepte se Kowonaviris yo genyen. Nou gen kòm egzanp yon epidemi fyèv popilasyon an di ki genyen nan peyi a [akote pandemi Covid-19 la] poutan otorite sante yo sètifye se sèlman Kowonaviris la ki genyen kòm epidemi fyèv an n Ayiti pou kounye a. Fòk nou ta antre fon nan sosyoloji ayisyèn lan pou n ta rive konprann epi eksplike konpòtman divès kategori moun sa yo.
Dapre previzyon kèk responsab nan Leta te fè sou jan maladi a pral layite nan peyi a, yo te di : << Ayiti ap konnen pi gwo kantite moun k ap kontamine epi mouri anba Kowonaviris la [pik] nan finisman mwa me pou rive koumansman mwa jiyè 2020 an >>. Lè n konsidere se 31 moun ki ta mouri nan Covid-19 la pou 24 me a, dapre chif otorite sante yo, nou ta swete previzyon yo ale nan sans sa a rive nan delè mwa jiyè a.
Kisa ki eksplike previzyon sa yo pa kolte ak reyalite a ?
Èske se popilasyon an ki byen respekte tout mezi moun dwe aplike pou evite pwopagasyon viris la ?
Yon sèl kout je sou fonksyònman mache piblik ak transpò piblik nan peyi a, li pa difisil pou n jwenn repons ak kesyon sa a.
Èske te manke pwofondè ak rigè nan ipotèz syantifik ki te bay gwo chif sou kantite moun ki gen pou trape maladi a nan entèval yo te di a ? Oubyen tou èske se paske pa gen ase tès ki fèt nan tout peyi a pou rive konte kantite moun ki trape maladi a ?
Pandan kesyon sa yo rete kwoke sou pandemi grip ak fyèv la nan peyi a, yon bon pati nan popilasyon an toujou pa kwè nan egzistans maladi a nan peyi a [oubyen nan mond lan], yon kantite kontinye pa pete nan koton bay otorite yo santi nan sa k gen pou wè ak distans sosyal/fizik yo mande yo pran.
N ap raple, okenn nan konsiderasyon sa yo p ap anpeche viris la ouvè kò l nan peyi a.
Se mèt kò ki dwe kontinye veye kò !
Bilan egzat pou 24 me 2020 an :
• 1063 moun trape maladi Kowonaviris la ;
• 31 moun mouri ;
• 22 moun geri.
Ourdy DESSOURCES
Vision Info Plus - VIP
